沪语悦读:落叶秋思 |
您所在的位置:网站首页 › 落叶思秋 › 沪语悦读:落叶秋思 |
原创 王智琦 海上梦叠 来源:劳动报 作者:王智琦 改写、诵读:知足常乐 审阅、推荐:丁迪蒙 编辑:王乙其 老欢喜北宋词人范仲淹《苏幕遮》个开头一句:“碧云天,黄叶地。秋色连波,波上寒烟翠。”写得实在是好,连得元代著名个杂剧家王实甫勒《西厢记》里也要借用:“碧云天,黄叶地,西风紧,北雁南飞。”但是,我至今还是呒没弄清爽,范仲淹写搿首词个辰光,究竟是勒勒西北边塞主持防御西夏军事个辰光,还是拨贬黜,面对江南个一派秋景?更加没搞清爽,范仲淹看到个满地黄叶,到底是从阿里种树浪向飘落下来个? 当然咾,搿一切其实侪无关紧要个,范仲淹只用了区区六个字:“碧云天,黄叶地”,就拿澄澈明净个天空、金黄灿烂个大地个秋天介景象像煞是油画一样个展现勒勒眼门前。遥想脚下头个搿片土地,大江东去,浪淘尽,千古风流人物。时光勒勒勿停个流转,季节也跟牢仔更替,勿变个是,天空浪向照样是澄澈明净,大地仍旧会得接纳搭仔拥抱飘零个金黄色个树叶。只不过是玉环飞燕皆尘土,每一片落叶侪有得独具个姿态。尽管,最终个归宿是一样个,每一次搭土地深情个相拥侪是吻别。迭能一想,缤纷个落叶实在是值得珍惜个。 近年来,上海个天空越来越澄澈、通透,像碧玉一样,范仲淹“碧云天”个意境抬头就可以看到,而“黄叶地”个风景也无须踏破铁鞋了。2021年开始,上海各区县就已经有得41条“落叶勿扫”个景观道路,像静安区个常德路、黄浦区个复兴中路、长宁区个凯旋路、普陀区个花溪路咾啥,侪成为了深秋辰光上海观景、打卡、拍摄个绝佳之地。 我特别关注到,上海落叶树木主要是银杏、法国梧桐,市区里经常看到个,更加多个是法国梧桐搭仔银杏个落叶。法国梧桐个树叶经过一只大热天火辣辣个太阳个烤晒,完成了遮阳挡雨个重任,伊拉轻盈而潇洒个脱离了枝干,投向生伊养伊个大地,搿是生死轮回当中最最凄美、壮烈个辰光。而银杏树,则拨被称作活化石,嘉定就有棵1200多年个银杏树。伊枝干高耸伟岸,树叶圆润、金黄,勒勒大地浪向印满勒一只又一只灿烂个酒靥。迭个辰光,银杏个果子也陆续落下来了。剥开青颜色个外衣,呈现出来坚硬、洁白个外壳,里向则是淡青色个果仁。银杏个树叶、果实侪好入药个,果实微微有眼苦涩,就好像是秋天个离别,别有一番滋味。 秋天介个美景像图画,到处是探访秋天个游客。而人生到了秋天,眼望前方即将进入寒冷个冬天,总归勿免会得伤秋搭仔悲秋。尤其是经历过人生个磨难搭仔坎坷。绝代才女李清照亡国之后颠沛流离,丈夫突然离世,财宝又侪拨盗窃,面对牢“满地黄花堆积,憔悴损,如今有谁堪摘?”我想,伊是绝对呒没闲情逸致再来欣赏满地个黄花个。试想,上海人漫步勒勒落叶满地个金黄色个路浪向,是欣喜不已呢,还是留恋不舍呢?境由心生罢了。 作者:王智琦 诵读:知足常乐 —————————————————— 丁迪蒙 迪蒙,启迪蒙昧者也。上海市人。原上海大学中文系教师,多年来一直致力于沪语和海派文化的传承。沪语是吴方言的代表方言,是吴侬软语的典范。她既可以用来拉家常,也同样可以用来朗读各类诗歌散文。沪语完全可以书写,同粤语可以写作是一样的。本平台所有文章都是经过改写后,用沪语来演绎的,汉字书写也是正确的。 丁迪蒙所撰写的,与沪语相关的著作主要有: 《学说上海话》上海科技文献出版社 《听听说说上海话》少年儿童出版社 《实用沪语》复旦大学出版社 《上海话绕口令》少年儿童出版社 《上海方言词语使用手册》上海教育出版社 《上海话读成语故事》少年儿童出版社 《囡囡学童谣》,少年儿童出版社 《囡囡学成语》,少年儿童出版社 原标题:《落叶秋思》 |
CopyRight 2018-2019 办公设备维修网 版权所有 豫ICP备15022753号-3 |