《我是歌手》第三季，係中國大陸湖南衛視喺2015年第一季度播出嘅逢星期五晚後晚間檔音樂類真人騷節目，係2015湖南衛視節目巡禮重點推介嘅一檔節目，接檔節目《一年級》。節目由《我是歌手》系列節目製作人洪濤打造，音樂總監係香港資深音樂人梁翹柏，首期節目喺2014年12月20號喺湖南長沙HBS廣電中心錄製[1]，同埋喺2015年1月2號夜晚10點首播。

《我是歌手第三季》加盟歌手依舊匯聚咗大中華地區同埋其他地區嘅知名歌手。首發歌手包括中國大陸嘅韓紅、胡彥斌、孫楠、張靚穎、香港嘅古巨基、星加坡嘅陳潔儀同臺灣嘅黃麗玲。補位歌手包括中國大陸嘅李健、韓國嘅鄭淳元同臺灣嘅蕭煌奇；踢館歌手包括中國大陸嘅李榮浩、譚維維同馬來西亞嘅李佳薇，加盟《我是歌手第三季》共13位[2]。呢季賽制較前兩季有啲唔同，新增新生代歌手「踢館賽」，補位歌手喺踢館歌手後。

2015年3月27號夜晚，歷時三個幾月嘅《我是歌手第三季》落下帷幕，最終韓紅贏咗其他參賽歌手，攞咗《我是歌手第三季》歌王，李健攞亞軍、鄭淳元攞季軍。

第三季嘅賽制升級做「2+1」嘅全新模式。「2」代表同前兩季一樣嘅排位賽同淘汰賽，有7位歌手競演，每場都有500位觀眾聽審投票，每位聽審揀3位自己認為嗰場表現最好嘅歌手。排位賽冇淘汰，淘汰賽將淘汰一位歌手。兩場競演累計得票率最低嘅歌手將被淘汰出7人陣容。「1」代表新增嘅踢館賽，即喺淘汰賽後，在線嘅六位歌手會迎來一位新生代歌手挑戰。簡單嚟講，賽制由原來嘅兩場一輪變做三場一輪。

頭兩場競演，由7位首發歌手競演，兩場競演累計得票率最低嘅歌手將被淘汰出7人陣容。第三場競演將會係第一輪踢館賽，首位踢館歌手將會同首發六位歌手競演，如果踢館成功，喺嗰場競演贏咗一半嘅歌手，唱進前四名，加入在線歌手嘅陣容，嗰場競演排第尾嘅歌手將遭到淘汰，呢個時候第四場競演嘅歌手陣容將會係五位首發歌手、首位踢館成功歌手同首位補位歌手，而如果踢館失敗，踢館歌手將遭到淘汰，無緣接下來嘅競演，在線六位歌手將唔變到第四場同首位補位歌手競演[3]。

喺第五場競演完成嘅時候，7人陣容無論係首位補位歌手同六位首發歌手定係首位補位歌手、首位踢館成功歌手同五位首發歌手，每位歌手都會有兩場（第四場同第五場）嘅成績，兩場競演累計得票率最低嘅歌手將被淘汰出7人陣容。喺第五期，淘汰嘅歌手可能係一位首發歌手或首位踢館歌手更或者首位補位歌手。噉樣過關嘅六位歌手就有更多嘅可能性。之後嘅賽制將依照第三、四、五場嘅競演流程循環[3]。

《我是歌手第三季》共有七位首發歌手、三位踢館歌手同三位補位歌手。

喺保留原先嘅每兩場競演淘汰一位歌手，新嘅歌手加進來嘅賽制基礎上，新賽制設置畀優秀嘅新生代歌手挑戰（出道唔超過10年嘅歌手），提供一個一展身手嘅機會。踢館歌手喺嗰場競演赢咗一半嘅歌手，唱進前四名，就踢館成功，加入在線歌手嘅陣容，嗰場競演排第尾嘅歌手將遭到淘汰；相反踢館失敗，無緣接下來嘅競演。踢館賽嘅得票率唔會計落排位賽同淘汰賽入面，同時都唔會影響補位歌手嘅加入。喺第九期節目入面，洪濤宣佈「喺節目組經過跟專家顧問團協商後，踢館歌手同樣有資格參加突圍賽」[4]。

踢館歌手可以喺社交網站報名參加，呢個係製作單位規定嘅踢館報名方式，金曲獎新人得主李榮浩成為首個公開報名嘅歌手[5]。佢呢次舉動引發眾多新生代歌手報名，其中湖南衛視旗下超級女聲、快樂男聲、快樂女聲等超快系列選秀出身嘅多位歌手報名參加[6]；而經由中國好聲音出道嘅眾位選手都群起報名，紛紛表達想參加節目嘅想法[7]。隨後我是歌手官方微博確認，喺網絡上報名參加節目嘅歌手超過60位，將從其中抽取一位作為代表參加節目[8]。

呢季喺觀眾聽審投票外新增參賽歌手投票環節，令彼此之間投票揀出歌手心中比賽嘅頭三位歌手，排名唔計入比賽成績，但係得到第一嘅歌手都會得到節目嘅獎品，如：獎狀、鮮花、錦旗、獎牌等[3]。

注：

呢期係我是歌手第三季首場競演、為第一輪排位賽。第一期，喺北京時間2014年12月20號錄製、2015年1月2號夜晚10點喺湖南衛視首播。首場競演歌手出場順序由觀眾投票決定，觀眾期待值越高嘅歌曲，歌手就越遲出場。

呢期係我是歌手第三季第二場競演、為第一輪淘汰賽。第二期，喺北京時間2014年12月28號錄製、2015年1月9號夜晚10點喺湖南衛視播出。

第一輪，陳潔儀遭到淘汰。

呢期係我是歌手第三季第三場競演、為第一輪踢館賽。第三期，喺北京時間2015年1月8號錄製、2015年1月16號夜晚10點喺湖南衛視播出。第一輪，由李榮浩參加踢館賽、為首位踢館歌手，最終以第六名踢館失敗。

呢期係我是歌手第三季第四場競演、為第二輪排位賽。第四期，喺北京時間2015年1月15號錄製、2015年1月23號夜晚10點喺湖南衛視播出。第二輪，李健加入比賽、為首位補位歌手。呢期競演歌手出場順序由上一期排名靠前嘅歌手優先揀。

呢期係我是歌手第三季第五場競演、為第二輪淘汰賽。第五期，喺北京時間2015年1月22號錄製、2015年1月30號夜晚10點喺湖南衛視播出。

第二輪，胡彥斌遭到淘汰。

呢期係我是歌手第三季第六場競演、為第二輪踢館賽。第六期，喺北京時間2015年1月29號錄製、2015年2月6號夜晚10點喺湖南衛視播出。第二輪，由譚維維參加踢館賽、為第二位踢館歌手，最終以第一名踢館成功，而古巨基呢場排包尾遭到淘汰。

呢期係我是歌手第三季第七場競演、為第三輪排位賽。第七期，喺北京時間2015年2月5號錄製、2015年2月13號夜晚10點喺湖南衛視播出。第三輪，鄭淳元加入比賽、為第二位補位歌手。

呢期係我是歌手第三季第八場競演、為第三輪淘汰賽。第八期，喺北京時間2015年2月12號錄製、2015年2月20號夜晚10點喺湖南衛視播出。呢期，張靚穎出場順序原本係1號、韓紅出場順序原本係4號、譚維維出場順序原本係2號、鄭淳元出場順序原本係5號，後來張靚穎同韓紅交換出場順序、譚維維同鄭淳元交換出場順序。

第三輪，張靚穎遭到淘汰。

呢期係我是歌手第三季第九場競演、為第三輪踢館賽（終極踢館賽）。第九期，喺北京時間2015年2月13號錄製、2015年2月27號夜晚10點喺湖南衛視播出。第三輪，由李佳薇參加踢館賽、為終極踢館歌手，僅僅以一票之差以第五名踢館失敗。呢期係三季以來第三次出現並列排名同第一名至第五名競演歌手票數最接近嘅一場競演。

呢期係我是歌手第三季第十場競演、為第四輪排位賽（終極排位賽）。第十期，喺北京時間2015年2月26號錄製、2015年3月6號夜晚10點喺湖南衛視播出。第四輪，蕭煌奇加入比賽、為終極補位歌手。

呢期係我是歌手第三季第十一場競演、為第四輪淘汰賽（終極淘汰賽）。第十一期，喺北京時間2015年3月5號錄製、2015年3月13號夜晚10點喺湖南衛視播出。

第四輪，譚維維遭到淘汰。

呢期係我是歌手第三季第十二場競演、為淘汰歌手、補位歌手同踢館歌手嘅突圍賽。第十二期，喺北京時間2015年3月12號錄製、2015年3月20號夜晚10點喺湖南衛視播出。經過四輪競演後，孫楠、黃麗玲、韓紅晉級決賽；陳潔儀、李榮浩、胡彥斌、古巨基、李佳薇、譚維維、蕭煌奇、鄭淳元、李健進入突圍賽，爭奪四個突圍名額。張靚穎因為要去美國製作新專輯，3月11號發表聲明，唔再參加突圍賽[10]。呢期競演歌手出場順序係，踢館失敗嘅李榮浩同李佳薇只有1、2號位置可揀；在線歌手嘅李健、鄭淳元、蕭煌奇可隨便揀3－9號；非在線嘅四位歌手就抽籤揀剩返嘅位置。最終，李健、譚維維、胡彥斌、鄭淳元突圍成功。

呢期係我是歌手第三季第十三場競演、為總決賽。第十三期，喺北京時間2015年3月27號夜晚7點30分現場直播。

總決賽：分做兩輪。第一輪係「幫幫唱」環節，由歌手邀請幫唱嘉賓合演，排包尾嘅遭到淘汰。第二輪就係獨唱，由剩餘嘅六位歌手根據第一輪排名以「首尾兩兩對陣」嘅方式做對決（即第三名對第四名、第二名對第五名、第一名對第六名），當每組競演完畢後，觀眾需投票並得出最終三位「終極歌王候選人」，最後喺三位「終極歌王候選人」入面以觀眾投票形式產生呢季歌王。

總決賽第一輪係「幫幫唱」環節，由歌手邀請幫唱嘉賓合演，排包尾嘅遭到淘汰。呢輪競演歌手出場順序係，七位歌手之中首先抽出呢輪最後一位競演嘅歌手，嗰位被抽中嘅歌手能安排其中一位歌手順序係自己嘅前面（七號揀六號、六號揀五號、五號揀四號、四號揀三號），直至剩餘一、二號，將會另作抽簽揀出呢輪嘅出場順序。由於孫楠喺第一輪競演結束後宣佈退出比賽，令原本遭到淘汰嘅黃麗玲可以繼續競演[11]。

總決賽第二輪就係獨唱，由於孫楠喺第一輪競演結束後宣佈退出比賽，因此第二輪就自動變做「首尾兩兩對陣」嘅方式做對決，就唔使淘汰第一輪得票率最低嘅歌手（黃麗玲），當每組競演完畢後，觀眾需投票並得出最終三位「終極歌王候選人」，最後喺三位「終極歌王候選人」入面以觀眾投票形式產生呢季歌王。呢輪出場順序係，第三名對第四名、第二名對第五名、第一名對第六名。

總成績得出前，主持人公佈「終極歌王候選人」為鄭淳元、李健同韓紅，最後韓紅以44.35%嘅得票率優勢擊敗李健嘅33.06%得票率同鄭淳元嘅22.58%得票率，攞《我是歌手第三季》歌王。

呢期係我是歌手第三季第十四場競演、為「2015巔峰會」。第十四期，喺北京時間2015年4月3號夜晚10點現場直播。呢季巔峰會，由第一季嘅黃綺珊、楊宗緯，第二季嘅韓磊、曹格、張杰、周筆暢，第三季嘅韓紅、李健、鄭淳元、黃麗玲、譚維維同胡彥斌共十二位歌手參加。呢期出場順序係，兩隊各派一位歌手抽籤，抽到數字1嘅戰隊先派一位歌手出場而佢將會係第一個出場。

喺2015年湖南衛視招商會入面，第三季嘅獨家冠名權仲係被立白集團攞咗，以三億元人民幣攞咗冠名權[13]，比第二季嘅高0.65億元，成為2015年湖南衛視三檔最吸金嘅節目之一，排喺《爸爸去哪兒》第三季（5億）同《快樂大本營》（3.5億）之後[14]。

節目錄製前，網絡就開始盛傳韓紅參加比賽，但之後韓紅喺採訪到講明冇參加呢個比賽[15]。呢個舉動被外界認為係湖南衛視藉此炒作。但喺節目嘉賓確認嘅時候，韓紅個名竟然喺榜上[16]。

張靚穎原本從湖南衛視超級女聲出道，出道到依家星途順遂，依家係中國大陸其中一個最出名嘅歌手[17][18]。洪濤喺第二季嗰陣請過張靚穎，但都被佢拒絕。喺第三季籌備嗰陣，外傳洪濤再次發起攻勢，多次以人情遊說請張靚穎參加。喺11月嗰陣，張靚穎喺新專輯發佈會入面回應，話熱愛《我是歌手》嘅舞臺，但節目錄製期間同佢嘅行程發生衝突，否認參加節目[19]。之後有網民爆料，洪濤幾次遊說張靚穎參加，最終張靚穎12月11號喺新浪微博寫咗「我去」嘅字樣，答應參賽[20]。

呢次經紀人首發共有8位，而歌手只有7位，所以喺歌手簽約環節中落單嗰一個人就會直接淘汰。最後，沈夢辰無法順利同首發歌手簽約。之後，李健作為首位補位歌手，沈夢辰被安排為佢嘅經紀人[21]。

競演規則講到明所有歌手由上台開始一直到唱到謝幕嘅過程入面唔畀講嘢，只可以用音樂去打動觀眾。喺第五期競演入面，除咗主持人外嘅六位歌手入面，得兩位歌手尊重競演規則，其他四位歌手唱完後喺台上違規開腔[22]。即使總導演洪濤喺節目入面表現到同平時冇咩唔同，但根據記者從知情人士到知道喺宣佈競演名次前，洪濤首次喺錄製入面黑面，並鄭重重申《我是歌手》嘅競演規則，唔點名咁警告幾位歌手嘅競演表現[23]。隨後，洪濤通過佢嘅社交網站否認[24]。

呢季總決賽首次用5.1環繞聲現場直播，音響系統比前兩季仲複雜。由於節目組事先冇對延時補償功能進行充分調試，導致第一輪「幫幫唱」環節嘅所有競演喺湖南衛視高清頻道播出嘅版本同網絡版都出現唔同程度嘅人聲同伴奏唔同步嘅現象。之後節目組喺第二輪嘅獨唱環節開始之前對所有故障做咗排查，問題先解決到。而之後嘅重播版本同芒果TV播出嘅網絡版亦修復咗幫幫唱環節嘅故障。

喺首場競演完後，星加坡歌手陳潔儀唱嘅《心動》排包尾，引起網上熱烈討論[25]。但陳潔儀喺第二期節目翻唱張學友《心如刀割》，扭轉唔到劣勢，做咗首位淘汰歌手。佢喺接受採訪嗰陣講咗自己被淘汰嘅原因：「可能從頭到尾的原因就是因為我不是競技歌手，愛聽我歌的人可能都宅在家裏，我不會責怪沒有投票給我的人。」[26][27] 儘管場內排名唔高，佢喺場外就格外火爆。佢嘅演唱喺業內被認可，有好多業內人士喺微博到撐佢，仲攞到「不飆高音不炫技，用最真實的自己滋養聽歌者心靈」嘅好評[28]。喺香港，唱片行好快揾到佢嘅唱片庫存，擺咗喺「熱門」位置去賣。有部分觀眾同埋音樂圈人都被陳潔儀吸引，都奉佢做摯愛[29]。但係，有傳佢翻唱《心如刀割》「成場都走晒音」，靠後制修正先播到[30]。喺現場睇錄影嘅記者仲話，首戰令人驚艷嘅黃麗玲第二戰出現咗一個驚悚嘅破音，但係播出時就一切正常，懷疑節目有修音。[31]新浪網認為，製作單位重金去請歌手，出於對佢哋嘅尊重，製作單位喺後期為保證節目質量同埋明星個人嘅形象的確會進行一定嘅加工，並指出第二季嘅品冠喺唱《我不難過》時都全程跑調，但播出時就變咗一切正常[31]。 對於媒體報導同樂評人嘅講法，節目組並冇做任何回應[32]。 而陳潔儀經紀公司就回應話：「潔儀在海外有很多大型成功演出，而在中國現場演唱不多，初期難免會讓這種報導有機會來溷淆沒聽過她現場的朋友，來對她的現場演唱產生質疑。希望未來潔儀在中國能有更多現場演唱去讓大家直接認識她，而不用借由這些片面的報導。」[33] 另外，同樣係參賽歌手嘅張靚穎接受《廣州日報》記者微信採訪嗰陣，對於修音問題講咗：「不同的音樂有不同傾聽的環境，我不覺得電視對比現場有太大變動。」[34]

李榮浩喺第25屆金曲獎因首張唱碟《模特》拎咗「最佳新人獎」而一鳴驚人。2014年12月23號，李榮浩通過新浪微博報名參賽，做咗首個公開表達踢館意願嘅歌手[35][36]。面對首位踢館歌手李榮浩，韓紅幾次喺節目直接講「不希望我的小夥伴走」，呢句說話被網友解讀做「不喜新人加入」，質疑佢「抱團」排擠李榮浩；另外有觀眾發現喺導演洪濤宣佈韓紅名次嗰陣，韓紅起身同每位歌手擊掌慶祝，唯獨冇同李榮浩。部分網民因此喺網上大肆攻擊韓紅，咁多負面評論湧現喺佢嘅社交網站底下[37] [38]。百口莫辯嘅韓紅無奈之下就連發兩條微博回應：先話係自己神經大條所以唔記得同李榮浩擊掌，表示自己好鐘意李榮浩，可能係電視剪輯嘅效果令網友產生誤會[39]；十分鐘後，韓紅又發微博痛責自己唔係故意咁做[40]。最終，李榮浩以第6名踢館失敗。

青年歌手姚貝娜因乳腺癌復發，2015年1月16號下晝4點55分喺北京大學深圳醫院病逝，得年33歲。我是歌手第三季嘅官方微博發文悼念歌者姚貝娜，我是歌手節目組喺1月16號嘅節目入面增加紀念姚貝娜嘅內容，片尾播放紀念姚貝娜嘅視頻，仲以《生命的河》做嗰期節目片尾曲[41]。據佢嘅父親姚峰描述，姚貝娜生前諗過參加我是歌手，未能參加喺佢生前最大嘅遺憾[42]。之後喺第八期節目入面，佢生前嘅圈內好友譚維維唱咗佢生前曾喺《中國好聲音》第二季唱過嘅歌《也許明天》，嚟懷緬佢。喺譚維維唱嘅《也許明天》入面，融入咗姚貝娜唱過嘅《Let It Go》同《魚》嘅旋律[43]。

古巨基作為第三季節目主持人，喺唱完《愛與誠》之後，以風趣另類嘅主持風格令現場觀眾爆笑連連。喺進行開場口播時，古巨基鄭重其事咁話：「下面一句話是總導演叮囑我要好好念的。」然而略有緊張嘅佢仲係將「立白皂液洗護合一新升級」錯誤咁讀咗做「立白皂液洗護合一新專輯」，成為全場最詼諧嘅小插曲[44]。喺第一輪淘汰賽前，因張靚穎選唱張學友嘅粵語歌《餓狼傳說》，古巨基用手機幫佢糾正粵語發音，但係被虧佢學粵語歌嘅速度比佢學國語歌更快[45]，後來正式授課反而似嚴師[46]。喺2月6號播出嘅第二輪踢館賽入面，古巨基首次排第尾，由於譚維維以第1名踢館成功，令佢成為節目史上首位遭到淘汰嘅主持人[47][48]。

突圍賽開始前，張靚穎通過公司少城時代發布聲明，宣佈退出比賽。佢嘅工作人員接受騰訊娛樂采訪時話，佢今年即將發行英文專輯，有大量製作需要喺海外完成，同埋突然接收到重要工作邀約，時間無法配合因此不能繼續參賽[49] 。但網民依然對佢嘅退賽理由有好多意見[50]。 而《我是歌手》節目組喺第一時間就回應支持同理解佢嘅決定，期待未來嘅合作[51]。 比賽完咗幾個月後，佢終於講返佢無法參加突圍賽嘅原因喺由於接到演唱荷里活影片《終結者：創世紀》全球主題曲嘅邀請，仲解釋當時出於片方嘅保密協議無法向觀眾進行詳細說明。

總決賽第一輪競演結束後，孫楠宣佈退出比賽，希望將爭奪歌王嘅機會留給其他歌手，引發現場一片譁然。後來導演組決定尊重孫楠決定，根據除去孫楠成績後嘅排名進行第二輪比賽，都即係除咗孫楠外嘅歌手全部進入第二輪比賽，結果第二輪比賽順序變做：胡彥斌對決鄭淳元，譚維維對決李健，韓紅對決黃麗玲[52]。好多觀眾批評孫楠嘅呢個行為不負責任，仲引發咗線民對各種「內幕」嘅猜測[53]。而主持人汪涵臨危不亂，撐場三分鐘，畀節目組留出咗臨時修改流程嘅寶貴時間，獲得唔少同行同埋線民嘅讚揚。

喺第二季攞咗亞軍嘅鄧紫棋獲節目組邀請參加「2015雙年巔峰會」。鄧紫棋經紀公司蜂鳥音樂話因爲需要拍MV、錄音等工作，佢無法再改編新曲，所以同節目組提出要唱新歌，吾使編曲嘅工作，先答應參加[54]。節目組初頭應承，喺彩排前兩日就違背先前嘅協議，要求佢表演翻唱歌，但佢無法喺短時間內同兼顧其他工作下作出好嘅編曲，因此爲咗表演質量而要求堅持原先嘅協議，想表演新歌。[55]佢最終被黃麗玲替換，退出巔峰會[56]。佢同真正經紀人張丹「耍大牌」嘅批評再次散播[57]。呢件事疑激嬲節目導演組，隨後傳出被湖南衛視封殺嘅消息[58]，但被洪濤否認[59]。

根據造字工房核實，節目組喺未獲得造字工房許可嘅情況下，用咗包括造字工房力黑體、造字工房朗倩體在內共5款造字工房字體。根據初步核算，節目製作方需要畀15萬元嘅使用費。1月4號，節目組製片方已經同造字工房聯繫，仲對未經授權使用字體事宜表示歉意同表示對設計版權嘅尊重。1月26號，造字工房話，字體侵權事件已妥善解決，湖南衛視將簽約使用造字工房更多正版字體[60]。

呢季節目喺2015年1月2號起逢星期五夜晚10點喺湖南衛視播出。新媒體平台方面，HBS旗下視頻網站芒果TV都將獨家播出，呢季節目唔再將版權畀其餘視頻網站[61]。

HBS旗下嘅交通頻道、金鷹955電臺同音樂之聲等3條廣播頻率會同步轉播我是歌手第三季。呢季節目中出現嘅所有歌曲由QQ音樂獨家發行[62]。

臺灣嘅八大綜合台同八大電視臺喺3月14號開始播出第1集。

節目採用嘅音響系統詳細資訊顯示如下表[69]：